Stranda kommune skal starte ein prosess med å styrke toppleiinga. Til dette skal kommunen leige hjelpe utanfrå. Kommunestyret har gitt formannskapet fullmakt til å sette i gang arbeidet.

Det er Nyss som fortel dette. Ikkje kommunen. Og nettopp det undrar meg. Nei, forresten: Frå kommunen har det vore smått stell med informasjon det siste året. Noko fleire har etterlyst. Gjennom Nyss. Eg stiller i rekka.

Med bakgrunn i det avisa melder, føler eg behov for å vite årsaka til at kommunen må hente inn ekstern hjelp for å styrke den administrative leiinga. Etter vedtaket er det neppe grunn til å tvile på at kommunen har interne problem å gripe tak i. Derfor ber eg at rette vedkomande no grip til pennen.

Vi som bur i kommunen har krav på informasjon.

At prosessen vil gi hogg inn i den frå før slitne økonomien, er det neppe grunn til å stille seg tvilande til. Også dette ynskjer eg å vite meir om.