Fotball-EM: – København framleis på kartet

Uefa held fast på at det skal spelast EM-fotball i København under meisterskapen i sommar. Ei rekkje alternativ finst.
sport

Torsdag hevda Bayern Munchens styreleiar Karl-Heinz Rummenigge at Uefa jobbar med ein plan om å arrangere EM i berre eitt land. Meisterskapen skulle vore arrangert i tolv europeiske byar i 2020, men vart utsett på grunn av koronasituasjonen.

Ifølgje Martin Kallen, som er Uefas EM-direktør, er planen at EM skal spelast i fleire land. Danmark skal vere eitt av dei.

– Vi spelar i København med mindre dei danske styresmaktene forbyr det, seier han til TV3 Sport.

Ifølgje Kallen skal planen no vere å avgrense EM til åtte byar i staden for opphavleg tolv. Ei endeleg avgjerd er venta i mars.

(©NPK)