I siste kommunestyre fekk vi høyre frå kommunedirektøren det mange har hatt mistanke om, nemleg at fire rom ved BUAS står ubrukte. Dette vart grunngjeve ved mangel på fagpersonell, og vanskar med rekruttering. I staden vil ein dreie tilbodet mot heimebasert omsorg og førebygging. Samstundes vart det forsikra om at romma var klare dersom det vart behov. Og – berre så det er sagt: Dette har ikkje vore handsama i kommunestyret.
Vel, det er vel liten tvil om at det er behov for å bruke romma. Det er heller ikkje tvil om at behovet vil auke i framtida. Vi veit at talet på eldre vil, og levealderen vil auke. Sjølv om fleire kan greie å bo heime, vil det bli behov for fleire institusjonsplassar. SV kjem til å kjempe for at romma skal takast i bruk.
Elefanten i rommet – trugsmål om anbod
Kommuneøkonomien er trong i dei fleste kommunane i Norge, også i Sykkylven. I inneverande år gjennomfører kommunen eit omorganiseringsprosjekt (eit finare ord for effektivisering og/eller nedskjering) som skal redusere drifta i kommunen med 25 millionar. Samstundes er det fleire parti som lovar å fjerne eigedomsskatten som er på 17 millionar. Det vil medføre ein reduksjon på nær 42 millionar i høve 2022-budsjettet. Og då har vi ikkje ein gong byrja å sjå på dei auka renteutgiftene som slår inn neste år. Kanskje ligg dei ein reduksjon (nedskjering) på 55 - 60 millionar i potten.
Dei to store partia på høgresida i politikken snakkar på nasjonalt plan både på innpust og utpust om å sette omsorgstenester ut på anbod. Det har det til no vore dørgande stilt om det i Sykkylven. Men la deg ikkje lure – det kan fort kome forslag om det, også i Sykkylven.
La det vere klinkande klart:
SV vil kjempe med nebb og klør mot å setje omsorgstenestene i Sykkylven ut på anbod.
SV vil aldri akseptere at dei tilsette i helse- og omsorgsektoren skal betale for utbytte hos kommersielle drivarar med lavare lønn og dårlegare pensjon!
SV har eitt klart mål: Helse- og omsorgstenestene i Sykkylven skal drivast av kommunen!