Kan Sykkylven bli ein attraktiv reiselivskommune? Ja, det meiner eg absolutt. Og etter mitt syn heng spørsmålet tett saman med eit anna: Er Sykkylven ein attraktiv kommune å bu i? Ein kommune som er attraktiv å besøke er også ein attraktiv kommune å bu i.

Sykkylven ligg midt i hjartet av Sunnmøre, ein region som kvar dag gjennom heile sommaren får besøk av store mengder turistar, til jugendbyen Ålesund og spektakulære Geirangerfjorden og Hjørundfjorden. Sykkylven får ikkje besøk av cruisebåtar, og bussar med turistar køyrer gjennom bygda i store antal. Men kanskje er det ikkje masseturismen Sykkylven skal trakte etter. Lat oss heller bli kjent som kommunen som satsar på kvalitet og særpreg, og som er godt vertskap. Vi har familievennleg turterreng, og løyper både for sommar- og vinteraktivitetar. Kyststien er i startgropa for å gje besøkande opplevingar og innsikt i lokal kultur og tradisjon. Vi har galleri, museum og fornfunnområde som viser korleis Sykkylven har blitt den kommunen vil lever i i dag. Vi har produsentar av alle slags matvarer som kan by fram produkta sine til ei veksande gruppe forbrukarar som vil vite kor maten dei et kjem frå. Kva om lokale matprodusentar kan gå saman om å leige eit av dei ledige lokala i Sykkylven sentrum og etablere ein spisestad for kortreist mat og drikke?

Vi har etter kvart fått ein perlerad av arrangement som fyller sommarhelgane i Sykkylven med opplevingar for små og store: Hundeidvik fotballfestival, Teknologifestival, Sykkylvsdagane, Småbåtfestival, Auremarkadagar, Brøvøllfestivalen. Kva med å sy desse dagane saman til ein serie arrangement og lansere dei som Sykkylven sommarfestival?

Dette innlegget kjem i samband med ein valkamp der mange stiller krav og spørsmål til politikarar og kommunen, eller lover innsats frå eige parti. Skal Sykkylven bli ein kommune der også reiselivet gjev stabile arbeidsplassar, må fleire gode krefter gå saman. Kommunen kan ikkje gjere jobben åleine, men kan spele rolla som aktiv tilretteleggar gjennom næringsapparatet og kulturavdelinga som må få ressursar til å løyse dei mange oppgåvene. Kommunen må vere med å leggje til rette for merking og skilting av attraksjonar og turløyper, kommunen må vere med å utvikle ein digital plattform som gjer Sykkylven sine mange tilbod kjende verda over. Kommunen må utarbeide framtidsretta arealplanar som sikrar vern av natur og tilgang til naturområde for alle. Kommunen må sørge for aktiv oppfølging og tilpassing av masterplanen for reiseliv som kom hausten 2022.

Og sist, men ikkje minst, må alle bidra med gode idear og støtte til dei som vågar å satse på opplevingsnæringar og bruke dei lokale tilboda som finst, høgt og lågt! For ein god stad å bu er også ein god stad å besøke – sommar som vinter.