Kan Frp gjere eit brakval i Sykkylven?

Les i Sunnmørsposten at det kan gå mot eit brakval for Framstegspartiet i Møre og Romsdal, og at partiet kan få fylkesordføraren. Det same gjeld for Ålesund der Frp fossar fram med god margin, som betyr at partiet kan få ordføraren. Også i fleire andre kommunar på Sunnmøre har Frp så langt gjort det godt på meiningsmålingane. Slik også i Sykkylven om vi skal tru trenden på eit barometer som heiter Poll of polls. Sjølv om eit slikt valbarometer ikkje er til å stole fullt og heilt på, så er det likevel ein indikasjon og trend på kvar dei politiske partia står i landskapet.

Framstegspartiet kan faktisk gjere eit brakval også i Sykkylven, og kan få inn mellom åtte og ti mandat i kommunestyret. Om vi skal tru trend-målingane, så kan Frp bli det største partiet i Sykkylven etter valet den 11. september. Kva vil då skje i forhandlingsprosessen. Får Frp ordføraren?

Eg har tidlegare skrive at det største partiet etter valet skal få tilbod om ordføraren. Her er det «kjøtvekta» og fleirtalet av veljarane som skal vere avgjerande. Så får det største partiet vurdere ordførartilbodet og vidare forhandle om viktige verv og posisjonar saman med andre parti for å skape ein god koalisjon.