Fleire har omtalt valet i Stranda som eit skjebneval for kommunen vår. Skal vi fortsette på same kurs som har ført oss inn i eit økonomisk uføre av enorme proposjonar, eller skal vi forsøke å stake ut ein ny kurs for kommunen? Høgre ynskjer å etablere eit nytt politisk debattklima og stake ut ein ny kurs for Stranda. Høgre-lista i Stranda har kanskje mange unge og relativt uerfarne kandidatar, men kanskje Stranda treng nokon som kan sjå andre løysingar på utfordringane vi står oppe i.
For meg er det særleg ei sak som gjer at eg ynskjer å engasjere meg i denne valkampen; Skal vi snu den negative folketalsutviklinga treng vi å tenkje stort, og så heilskapen i samfunnsutviklinga, særleg knytt til gode og attraktive oppvekstmiljø.
Forskarar gir skjeldan eintydige svar på kva som tel mest når folk skal velge kvar dei skal busette seg. Nyare forsking tyder på at nærleik til skule, barnehage og kultur og fritidstilbod er vesentleg viktigare for busettinga enn t.d. tilgang på arbeidsplassar. Folk køyrer gjerne i 30-40minutt for å kome seg på arbeid, men dei ynskjer ikkje at borna skal måtte reise tilsvarande for å kome i barnehagen eller på skulen!
Det kan vere mogleg å hente ut ein økonomisk gevinst på å slå saman og leggje ned skular og barnehagar, men i den langsiktige samfunnsutiklinga kan hastig fatta vedtak få uventa konsekvensar i dei komande åra.
For meg er dette perspektivet det viktigaste. Vi må makte å sjå lenger fram enn nasen rekk. For at kommunen vår skal kome gjennom den økonomiske krisa vi står i, må vi gjennomføre ei økonomisk omstilling slik at bygdene våre vert meir attraktive bu- og oppvekstbygder. Dei store samfunnstrendane har i lengre tid gått i retning av meir urbanisering og sentralisering. Dette er ein konkurranse vi aldri kan vinne! For at Stranda skal få ei positiv utvikling treng vi å spele på våre unike kvalitetar. Natur, kultur, skule, oppvekst, rimelege bustader, tryggleik og tillit er sentrale omgrep. Kommunegrenser er strekar på eit kart som har svært liten innverknad på bulysta til innbyggjarane, men attraktive oppvekstmiljø er heilt avgjerande! Samfunnet endrar seg med rekordfart og den teknologiske utviklinga tvingar fram nye løysingar på gamle problem – dei fleste av løysingane vert tekne i bruk fordi dei rett og slett er betre eller sikrare enn dei gamle. Svært få framskritt har kome som følgje av politiske vedtak, men politiske vedtak kan både stoppe og bremse utviklinga. Vi som politikarar må difor legge til rette for og stimulere denne utviklinga og ikkje stå i vegen for framskritt og teknologi som gjer livet både lettare og tryggare for innbyggjarane.
Vi som stiller oss til disposisjon ved valet gjer det fordi vi trur på noko, og trur at vårt engasjement kan utgjere ein forskjell. Din viktigaste innsats, i denne omgang, vert å stemme på ein av oss. Bruk gjerne Høgrelista, og set gjerne eit kryss ved namnet til kandidatar du trur på, men viktigast av alt er at du brukar retten din til å stemme.
GODT VALG!