Når ein tilsett i “Sykkylvs-skulen” går ut i Nyss og etterlyser meir og betre informasjon om kva som skjer med eiga framtid, så er det både trist og skremande å lese svaret til kommunen framført av kommunalsjef.

Ikkje eit snev av sjølvkritikk på manglande informasjon, ikkje ein liten epistel om at ein kan freiste å betre informasjonsflyten, ikkje så mykje som eit komma om at alt kan gjerast betre.

Nei svaret er det smått sjokkerande: - Det er berre å gå tenestevegen, og spørje rektor eller tillitsvald, så vil vi vi prøve å gi svar på det ein skulle lure på.

Kommunen, via kommunalsjef Bjørnar Midtbust har akkurat fått spørsmål om kva tilsette lurar på, kvifor ikkje svare?

Midtbust, tør eg minne deg på at du faktisk ikkje berre er “sjef” for rektorane ved skulane, du har også øvste ansvar for dei som no undrar seg over dei har jobb i framtida. Dei som undrar seg over om dei kan bli buande i Sykkylven, eller om dei må på leit etter jobb andre stadar, og dei som akkurat no er i ein fortvila situasjon, og grip etter kvart eit lite halmstrå med informasjon om eiga framtid.

Om du tok oppfordringa og faktisk no sitt og undrar deg litt, trur du verkeleg det berre er EIN tilsett som fryktar det verste, og ikkje minst kvifor går ein ut anonymt i avisa, nei det er mange av oss. Tenesteveg, informasjon og tillit er nok ikkje det som står sterkast i etaten som du er øvste leiar for…

Det du gjer er å fråskrive deg og kommunen alt ansvar for dårleg komunikasjon, og rette skulda på rektorar og tillitsvalgte for ikkje å vidareformidle informasjon. PS: Ein “haste-epost” med info til alle tilsette, sendt etter at det smått famøse svaret i lokalavisa vår kom på trykk rettar nok ikkje opp i inntrykket. Tvert imot.