Snikkar og bonde: Jan Ove utdanna seg til tømrar og var i yrket i ca 25 år. Han tok over heimegarden i 1995.
Arbeid i Tine: Jan Ove var styreleiar i Tine Vest i seks år. Jan Ove lærte mykje i dette arbeidet, eit arbeid som han sjølv meiner var ein svært god læringsarena for ordførarrolla.
Lokalpolitikar: Jan Ove vart før valet i 1987 verva til å stå på Sunnylven si bygdeliste. Etter to periodar gjekk han over til Senterpartiet. I 2011 vann Sp kommunevalet, og Jan Ove vart ordførar. Denne posisjonen har han hatt til og med 2023.
Fylkespolitikar: Jan Ove er og med i fylkespolitikken. I denne perioden sit han på fylkestinget, og han er også medlem av fylkesutvalet. No sluttar Jan Ove som fylkespolitikar, og han vil bruke all tida si på ordførarvervet viss han får tillit.
Viktige vedtak som er gjennomførte i Stranda tettstad sidan 2011: I 2011 var Stranda kommune på gjeldstoppen i landet vårt. Mykje av arbeidet gjekk då utpå å få kontroll over økonomien. Mot statsforvaltaren sitt syn gjekk Jan Ove inn for at renoveringa av Stranda Ungdomsskule skulle fullførast, og Stranda sentrum fekk ein ny og svært tenleg skule. Seinare ville Orkla gjennomføre ei storstilt millionutbygging i Svemorka. Jan Ove stod då i spissen for å klargjere areal for utbygginga, og mange arbeidsplassar vart sikra. Det vart og satsa store summar på vassforsyning og avløpsløysing i området, også ei stor utbygging avgjerande for næringslivet.
Naturbruk: Dette året er det sett i gong ei ny linje ved Stranda vidaregåande skule, naturbruk. Denne linja er Sp sitt verk. Jan Ove hadde lyst til at ei slik linje skulle kome i gong. Han kontakta då Per Ivar Lied (Sp)som er leiar for Utdanningsutvalet i fylket, og han fekk fylket til å starte opp denne linja. Gunhild Kvam (også Sp) har førebudd og planlagt linja på skulen.
Sinnsro: Jan Ove er ein svært sakleg politikar og brukar aldri skjellsord om politiske motstandarar. Han har fått ikkje så reint lite kritikk og ufin omtale av delar av opposisjonen, men berre ein gong kan eg hugse at han vart sint. Ein slik veremåte er i seg sjølv svært imponerande.
Ein samla kommune: Jan Ove kjempar hardt for at Stranda kommune skal vere samla også i framtida. Somme parti legg diverre opp til å setje bygdene opp mot kvarandre, men å skape splid for å sanke stemmer, er ikkje særleg framtidsretta. Å skape konfliktar er ikkje Jan Ove sin veremåte, han ser alle bygdelaga som like viktige.
Ordførar i den nye perioden: Vi meiner Jan Ove er den suverent sterkaste kandidaten som ordførar i den komande perioden. Ingen andre av ordførarkandidatane nærmar seg hans røynsle og evne i dette viktige vervet. Difor: Bruk stemmeretten din og stem Senterpartiet i det komande valet!