Barn og unge i Stranda kommune treng politikarar som vil motverke diskrimineringa av nynorskelevane. Kva vil partia gjere for å fremje bruken av nynorsk i den komande valperioden?
Alle partia som stiller til val i Stranda kommune har skrive programma sine på nynorsk. Dei aller fleste innlegga frå listekandidatane er også på nynorsk. Det er eit tydeleg uttrykk for at nynorsk som skriftspråk og dei lokale dialektane står sterkt i kommunen.
Samstundes er det ei kjensgjerning at nynorsk, som eit mindretalsspråk, er under press. Då Stortinget i vår vedtok ny opplæringslov, nekta fleirtalet å gi nynorskelevane likeverdige opplæringsvilkår. Kravet om at alle læremiddel og læringsressursar skal ligge føre på både nynorsk og bokmål blei avvist. Difor er det viktig at lokalpolitikarane gjer det dei kan for å stoppe diskrimineringa av nynorskelevane. Til det trengst både vilje og ressursar, og ikkje minst evne til å vise leiarskap som «skuleeigar».
I vinter sende Stranda mållag innspel til alle partia i Stranda. Etter det vi kan sjå er det berre Høgre og Senterpartiet som har aktive språkformuleringar i programma sine. Senterpartiet formulerer seg kort og forpliktande. Høgre skriv grundig og godt om verdien av nynorsk språk og kultur, men tar nokre unødige atterhald.
Stranda mållag spør alle partia:
Korleis vil de syte for at elevane i kommunen får rettmessig tilgang på læremiddel, læringsressursar og skriveprogram på nynorsk?
Vil de syte for at den kommunale språkopplæringa for vaksne innvandrarar er på nynorsk?
Godt val!