Les i Nyss onsdag at det vert etterlyst engasjement frå politikarane i Sykkylven, samt litt om kva som skjer i Sykkylven kommune i ei krevjande tid.

Sykkylven hadde også formannskapsmøte med budsjett som hovudtema i slutten av november. Det var ikkje dekt av presse, og eg trur det er fyrste gangen det har skjedd medan eg har vore med. Eg vil tru der var ting som er av interesse for innbyggarane, og sikkert ein glipp at lokalavisa ikkje var der. Blant anna at politikarane ikkje ville auke eigedomsskatten, gjennomgang av kommunale bygg og kva tankar kommunedirektøren har for framtidig bruk, er eksempel på saker som var oppe.

Siste nyhendesaka frå Sykkylven kommune i Nyss, var sist fredag der Sykkylven næringsutvikling, som er kommunen si næringsavdeling, har gått inn ein lengre samarbeidsavtale med Rauma og næringshageprogrammet der. Dette vil igjen gjere at bedriftene i Sykkylven får endra fleire mogelegheiter i åra framover.

Sykkylven kommune prøver å oppdatere jamt med informasjon om framdrift på ulike prosjekt som t.d. nye-skulen og biblioteket på Facebook og heimeside. Eg råder alle til å fylgje både Skarglede.no og Sykkylven kommune, på heimeside og Facebook.

Sist markering var opning av nye busslomma i sentrum. Der har det vore diskusjonar i avisa om val av buss-skur, noko som er fullt mogeleg å rette på, men dei fleste ser ut til å vere særs nøgd med at bussane endeleg har fått ein ny oppstillingsplass. Vegen opp Meieridalen og utbetring av Ikornnesvegen var ikkje 100 % ferdig før snøen kom, og vi valde å vente på ei eventuell markering der.

Storsatsing på ny skule, med idrettshall og kulturskule, samt eit nytt bibliotek, er ikkje prosjekt det har vore stor politisk usemje om, og kan vere noko av forklaringa på at det under vegs ikkje har vore stilt mange spørsmål. Nyss var og med på omvising i haust på skulen og laga ein solid reportasje.

Til det at det er lenge sidan eg svarte i avisa eller var inne med innlegg; det siste var nok når det kom opp spørsmål om busslomma i haust, og kvifor den ikkje hadde offentleg toalett m.m.

Elles hadde vi besøk frå Stortinget av Geir Inge Lien for 2 veker sidan, der saka om Innovern på nytt vart tatt opp saman med ein god del andre saker. Det stod ei heilside i Nyss om dette besøket og kva som var tema. Av andre saker det har vore jobba med, har vore venterom på Aursnes, parkering på Magerholm. Så må vi og minne kvarandre på at 2022 vart det året bedriftene i Sykkylven fekk same arbeidsgivaravgift som i Stranda kommune, og Ekornes aleine sparer om lag 20 million årleg. Dette er ei sak næringslivet og politikarane har jobba med i mange år.